Ukrayına Silâlı quvetleriniñ darbesinden soñ Herson ve Qırım arasında tren seferleriniñ olması pek kiçik ihtimal. Bu aqta Büyük Britaniya Mudafaa nazirligi memleketniñ istihbarat malümatına esaslanıp bildirdi.
«Ukrayınanıñ Ukrayına cenübindeki Herson vilâyetinde Rusiyeniñ silâ trenine endirgen darbesi neticesinde Herson ve Qırım arasında tren seferleriniñ olması pek kiçik ihtimal», – dep aytıla haberde.
İyülniñ 29-nda Herson vilâyeti arbiy memuriyetiniñ yolbaşçı mesleatçısı Serğiy Hlan Brılivka qasabasında tren vokzalına endirgen darbe aqqında bildirdi. Onıñ aytqanına köre, işğalciniñ müim logistik qavuşağından biri yoq etildi. Ukrayına Mudafaa nazirliginiñ «Yug» operativ komandanlığı bu rayondaki tren stantsiyası yanında Rusiye tehnikası ve ordusı olğan eşelonğa darbe endirildi, dep tasdıqladı.
Soñki vaqıtları Ukrayına duşmannıñ askerlerine, tehnikasına darbe endire. Bir qaç köpür, hususan Hersondaki Antoniv köprü de zarar kördi. Köpürdeki areket qapatıldı.
Antoniv köprü – Rusiye ordusı tehnikasını ve silâsını taşığan Dnipro özeni üzerinde Hersonnıñ yekâne köprüdir.
Britaniya istihbaratı bildirgenine köre, rusiyelilerniñ Dnipro üzerinden vaqtınca köpür qurmaq ıntıluvı pek yüksek telükeli operatsiya olacaq, Dniproda köpür olmasa ise – Rusiye ordusı işğal altındaki «Hersonda ayrı qalacaq ve bu Rusiye içün büyük bir arbiy-siyasiy darbe olur».
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
