Bu yıl «Qırım platformasınıñ» sammiti avgustnıñ 23-nde online keçirilecek. Bu aqta «Qırım platformasınıñ» matbuat hızmeti bildirdi.
«Rusiye Ukrayınağa qarşı başlatqan büyük istilâsına baqmadan, işğal altındaki Qırım meselesi eñ yüksek siyasiy seviyede kene aktual olacaq. Fevralniñ 24-nden soñ peyda olğan bir sıra mesele bar: işğal etilgen Qırım Rusiye tarafından Herson ve Zaporijjâ vilâyetlerine ücüm etmek içün platsdarm olaraq qullanıldı, devletimizniñ cenübini işğal etmek içün bir baza olaraq, esas Ukrayınanıñ vaqtınca kontrol etilmegen topraqlarından qanunsız çıqarılğan ukrayınalılarnı tutmaq içün «qara alan» olaraq qullanıla», – dep aytıla haberde.
Qayd etilgenine köre, sammitke bıltır «Qırım platformasınıñ» beyannamesine qoşulğan devletlerniñ yolbaşçıları davet etilecek.
«Qırım platformasınıñ» ofisi online sammitke yañı liderler de qoşulacaq, dep qoştı. Keçken afta Ukrayına prezidenti Volodımır Zelenskıy Gvatemala zenaatdaşı Alehandro Dmammattei Fayanı sammitte iştirak etmege davet etti.
«Qırım platformasınıñ» birinci tesis sammiti bu yıl avgustnıñ 23-nde olıp keçti. Anda 47 çetel devlet ve halqara teşkilât qoşuldı.
«Qırım platforması» – Ukrayınanıñ teşebbüsinen qurulğan halqara mesleat-koordinatsion formattır. Onıñ maqsadı Qırım işğaline qarşı halqara cevap semereligini arttırmaq, telükesizlik havflarınıñ artmasına cevap bermek, Rusiye Federatsiyasına qarşı halqara basqını quvetleştirmek, insan aqlarınıñ bozuluvına yol bermemek ve Rusiye rejiminiñ qurbanlarını qorumaq, em de esas maqsadı Qırımnı işğalden azat etip, Ukrayınağa keri almaqtır.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
