Ukrayına Prezidenti ofisiniñ yolbaşçı muavini Mıhaylo Podolâk Almaniya sabıq kantsleri Gerhard Şrederniñ Rusiye prezidenti Vladimir Putin Ukrayına ile cenkni diplomatik toqatuv içün «açıq» degen laflarına cevap berdi.
«Rusiye bir qolnen varvar cinayetlerinen terror derecesini arttıra, ekincisinen – teslim olmağa davet ete. Şreder – belli imperiya dellâlı ve Rusiye çar azbarındaki ses. Moskva dialog istese, top onıñ meydanında. Başta ateş toqtatıla ve ordu çekile, soñra konstruktiv olacaq», – dep yazdı Podolâk Twitterde.
Kreml ile alâqaları bar olğanınen belli sabıq kantsler Şreder N-tv alman telekanalına bergen intervyüsında keçken afta Moskvada «tatilde» olıp, Rusiye prezidenti Vladimir Putinnen körüşti ve «Kreml Ukrayınadaki cenk aqqında müzkere qararına irişmege istegenini» bildi, dep ayttı. O, ateş toqtatılğanına qadar «zahire añlaşmasını kenişletüv» imkânları aqqında ayttı.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrayinalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
