Link açıqlığı

Saatnıñ esas haberi

Qırımda «mahsus operatsiyada» elâk olğan eñ az 125 Rusiye arbiyi defin etildi – Taşeva


Tamila Taşeva
Tamila Taşeva

Ukrayına akimiyeti Rusiye işğal etken Qırımda Ukrayınağa qarşı büyük istilâ (Rusiye akimiyeti bunı «mahsus arbiy operatsiya» dep adlandırdı) vaqtında elâk olğan eñ az 125 Rusiye arbiyi defin etildi, dep qayd etti. Bu aqta iyülniñ 29-nda Kyivdeki brifingde Ukrayına prezidentiniñ Qırım Muhtar Cumhuriyetindeki daimiy vekili Tamila Taşeva bildirdi.

«İşğal altındaki Qırımda defin etilgen 125 Rusiye askeri aqqında malümat bar. 62-siniñ Ukrayına vatandaşlığı bar edi, ğaliba», – dedi Taşeva.

Qırım ve Aqyarnıñ Rusiye akimiyeti işğal etilgen yarımadadan elâk olğan ve yaralanğan arbiylerniñ sayısını aydınlatmay. Rusiye Federatsiyasınıñ Mudafaa nazirligi soñki vaqıtları Ukrayınadaki ğayıplar aqqında bildirmey.

Ukrayına istihbaratınıñ malümatına köre, Aqyardaki Rusiye Qara deñiz flotunıñ deñiz piyade askerlerniñ 810-uncı ayrı gvardiya brigadası Rusiye Ukrayınağa büyük istilâ kerçekleştirgen soñ eñ az 300 Rusiye arbiyini coydı.

Al-azırda Aqyarnıñ Rusiye akimiyeti Aqyarda yaşağan eñ az 40 Rusiye arbiyiniñ esas Ukrayınada elâk olğanını resmiy şekilde tasdıqladı.

Qırımnıñ Rusiye yolbaşçısı Sergey Aksenov Rusiyeniñ Ukrayınağa qarşı ücümi vaqtında Qırımdan da Rusiye askerleri elâk olğanını ayttı, amma sayısını aydınlatmadı. Qırım.Aqiqat Aluşta, Sudaq, Saq, Keriç ve Yaltada Rusiye arbiylerniñ cenazeleri oldı, dep bildirgen edi.

İyül ayında Aksenov «mahsus operatsiyada» elâk olğan qırımlılarnıñ adlarını soqaq ve skverlerge bermege ve olarğa eykel tiklemege çağırdı.

Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.

Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.

Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG