Yaqın üç ay devamında Beyazrusiye tarafından raketa ücümleri telükesi qalacaq. Bu aqta Ukrayına Silâlı quvetleri Baş ştabı Baş operativ idaresiniñ yolbaşçı muavini Oleksiy Ğromov bildirdi.
«Beyazrusiye tarafından Ukrayınağa yaqın üç ay devamında raketa darbelerini endirüv telükesi qala», – dep ayttı o, brifingde.
Onıñ aytqanına köre, Volın, Jıtomır ve Kyiv yönelişlerinde vaziyet kontrol altında, Beyazrusiye tarafından istilâ ihtimalı ise pek alçaq.
«Lâkin Rusiye ve Beyazrusiye mahsus bölükleriniñ Rusiye Federatsiyasınıñ ÇVK aydutlarınen beraber Ukrayına sıñırında silâlı provokatsiya yapuv imkânı inkâr etilmey», – dep qayd etti Ğromov.
Ukrayına Mudafaa nazirliginiñ «Şimal» operativ komandanlığınıñ malümatına köre, iyülniñ 28-nde saba Beyazrusiyeden 20 raketa çıqarıldı, doquzı Çerniğiv vilâyetiniñ ormanlarında tüşti.
Beyazrusiye Ukrayınadaki cenkte iştirak etmey, amma fevralniñ 24-nde başlağan Rusiye istilâsına maddiy-tehnikiy yardım köstere. Rusiye ordusınıñ bir qısmı Ukrayınağa Beyazrusiye sıñırından kirdi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
