Rusiye ordusınıñ Kropıvnıtskıyge qarşı raketa darbesi neticesinde beş kişi elâk oldı, daa 25 insan yaralandı, dep bildirdi Kirovograd vilâyetiniñ arbiy memuriyet yolbaşçısı Andriy Raykovıç Telegram kanalında.
Raykovıç, Rusiye raketaları angarlarğa ücüm etti, dep bildirdi.
«Raketalarnıñ çeşiti baqıla. Şimdilik raketa parçaları tapılmadı. Ekspertler çalışa. Raketa darbesiniñ aqibetleri yoq etile. Eki angarğa ücüm etildi. Can bergen, yaralanğanlar bar. Al-azırda 25 kişi hastahanege ketirildi. Beş kişi elâk oldı. Maddiy zararlar bar», – dep ayttı o, brifingde.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
