Ukrayınanıñ Herson vilâyetindeki qarşı ücüm arta. Bu aqta Büyük Britaniya Mudafaa nazirligi memleketniñ istihbaratına esaslanıp bildire.
«Quvetleri Rusiye işğal etken Hersonnıñ şimaliy sıñırını yapqan İngulets özeninden cenüpke doğru platsdarm yapqandır. Ukrayına Dnipro özeninden keçken eñ az üç köpürge zarar ketirmek içün uzun mesafeli toplarnı qullandı, çünki Rusiye mında silâ ketirmek içün bu köpürlerni qullana», – dep aytıla haberde.
«Olardan biri, Hersonğa yaqın 1000 metrlik Antoniv köprü, keçken afta zarar kördi. 2022 senesi iyülniñ 27-nde kene oña ücüm etti ve şimdi köpür qullanılmaycaq vaziyettedir», – dep qoştı istihbarat.
Olarnıñ qayd etkenine köre, Rusiyeniñ 49-ıncı ordusı Dnipronıñ ğarbiy yalısında yerleşe ve pek zayıf ola.
«Herson şeeri Rusiye tarafından işğal etilgen mesken yerler arasında siyasiy ceetten eñ emiyetli şeer ola, şimdi diger işğal etilgen topraqlardan ayrı qala. Onsız qalğan Rusiye işğalni muvafaqiyet olaraq köstermek ıntıluvlarına keder etecek», – dep bildirdi Britaniya istihbaratı.
Ukrayına prezidenti Volodımır Zelenskıy Ukrayına Rusiye işğal etken topraqlarnı kelecek 3-6 afta içinde keri almalı, dep bildirdi.
Soñki vaqıtları Ukrayına duşmannıñ askerlerine, tehnikasına darbe endire. Bir qaç köpür, hususan Hersondaki Antoniv köprü de zarar kördi. Köpürdeki areket qapatıldı.
Antoniv köprü – Rusiye ordusı tehnikasını ve silâsını taşığan Dnipro özeni üzerinde Hersonnıñ yekâne köprüdir.
Britaniya istihbaratı bildirgenine köre, rusiyelilerniñ Dnipro üzerinden vaqtınca köpür qurmaq ıntıluvı pek yüksek telükeli operatsiya olacaq, Dniproda köpür olmasa ise – Rusiye ordusı işğal altındaki «Hersonda ayrı qalacaq ve bu Rusiye içün büyük bir arbiy-siyasiy darbe olur».
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
