Rusiyeniñ Kyiv vilâyetine kerçekleştirgen raketa ateşi neticesinde 15 insan yaralandı, dep bildirdi Kyiv vilâyetiniñ Milliy polis idaresiniñ yolbaşçısı Andriy Nebitov.
«Kyiv vilâyetinde olğan raketa darbesi neticesinde 15 kişi yaralandı. Şimdi bu raqam böyle. Aynı vaqıtta ava telükesi signalı sayesinde daa büyük aqibetler olmadı», – dep bildirdi o, Telegramda.
Kyiv vilâyeti polisiniñ reberi daa bir Rusiye raketasınıñ parçaları Vışğorod yanında bir ormanda tapıldı – mında kimse yaralanmadı.
Ukrayına Silâlı quvetleriniñ Baş ştabı bildirgenine köre, Rusiye arbiyleri iyülniñ 28-nde saba Kyiv vilâyetindeki Lütejde arbiy bölükke «Kalibr» raketalarınen ücüm etti. Anda bir bina yıqıldı ve eki danesi zarar kördi. Daa bir qanatlı raketa Buça karyeri üzerinde tüşürildi.
Ukrayına devletçilik kününde, iyülniñ 28-nde, Kyiv vilâyetiniñ arbiy memuriyetiniñ malümatına köre, Rusiye arbiyleri Ukrayınağa 20 raketadan çoq endirdi. Beşi Kyiv vilâyetiniñ Vışğorod rayonına ücüm etti.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
