Avropa Birliginiñ şurası iyülniñ 26-nda Rusiyeniñ belli iqtisadiyat saalarına qarşı sanktsiyalarnı 2023 senesi yanvarniñ 31-ne qadar uzatmağa qarar aldı.
«İlk sefer 2014 senesi Rusiyeniñ Ukrayınadaki vaziyetni kerginleştirgen areketlerine qarşı kirsetilgen sanktsiyalar 2022 senesi fevral ayında Rusiyeniñ Ukrayınağa qarşı sebepsiz arbiy istilâsı sebebinden bayağı kenişletildi. Al-azırda olar maliye, energetika, tehnologiya ve ekili qullanuv malları, sanayı, naqliyat ve zenginlik şeylerini sıñırlağan keniş saa tedbirlerinden ibaret», – dep bildirdi AB Şurasınıñ matbuat hızmeti.
2014 senesi Qırım işğalinden soñ ve Donbasta cenk uruşları başlağan soñ Avropa Birligi Ukrayına topraq bütünligi, suvereniteti ve mustaqilliginiñ bozuluvınen bağlı sanktsiyalarnı kirsetti. O vaqıttan berli olarnı uzatalar.
2022 senesi fevralniñ 24-nden berli AB Rusiyeniñ Ukrayınağa qarşı büyük istilâsına qarşı «sebepsiz ve sert» sanktsiyalarnı kirsetti, dep hatırlattı AB.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrayinalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
