Rusiye Federatsiyası soñki saatlar içinde Harkiv, Mıkolayıv ve Odesa vilâyetlerine raketalarnen ücüm etti, dep bildirdi bu regionlarnıñ akimiyeti.
Harkiv şeer yolbaşçısı İğor Terehovnıñ Telegramda bildirgenine köre: «Şeerge gece kene ateş açıldı. Harkivde şeerge yaqın qısmına raketa tüşti. Adet üzre arbiy infrastrukturasınen bir alâqası olmağan bina yanına tüşti».
Onıñ qayd etkenine köre, ölgen ya da yaralanğanlar aqqında malümat yoq.
Mıkolayıv şeer yolbaşçısı Oleksandr Senkevıçnıñ saba haber etkenine köre, şeerde «küçlü patlavlar» oldı.
Odesa vilâyetiniñ arbiy memuriyet vekili Serğiy Bratçuk qayd etkenine köre, Odesa vilâyeti raketa ücümine oğradı.
«Odesa vilâyeti. Strategik aviatsiya uçaqları qullanılğan raketa ücümi. Tafsilâtlar – birazdan», – dep qayd etti Bratçuk.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrayinalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
