Rusiye kontrolindeki Qırım yolbaşçısı Sergey Aksenov Qırımnıñ şimalinde ve Keriçte terror telükesiniñ yüksek («sarı») seviyesi avgustnıñ 9-na qadar uzatıldı, dep bildirdi.
«2022 senesi iyülniñ 25-i saat 20:00-den 2022 senesi avgustnıñ 9-ı saat 20:00-ge qadar bir sıra belediyede ve cumhuriyet obyektlerinde terror telükeniñ yüksek («sarı») seviyesi olacaq. Hususan: Ermeni Bazar, Canköy, Keriç, Krasnoperekopsk şeerlerinde ve Canköy ve Krasnoperekopsk rayonlarında», – dep bildirdi Aksenov Telegram kanalında.
Bundan ğayrı, terror telükeniñ «sarı» seviyesi Qırımnıñ kritik infrastruktura müessiselerinde uzatıldı.
Aprelniñ 11-nde işğal etilgen Qırımda ve Ukrayına ile sıñırı olğan Rusiye regionlarınıñ akimiyetleri terror telükeniñ «sarı» seviyesini ilân ettiler.
«Sarı» seviye «terror ücümi kerçekleştirilecegine dair tasdıqlanğan malümat» bar demek. Sakinlerge tek kerek olğanda insanlar toplaşqan yerlerge barmağa, bir yerge çıqqanda ise şahsiyetlerini köstergen vesiqalarını yanına almağa tevsiye etile.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrayinalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
