Rusiye Odesa deñiz ticaret limanına «Kalibr» qanatlı raketalarınen ücüm etti. Bu aqta vilâyetniñ arbiy memuriyet vekili Serğiy Bratçuk Ukrayına Mudafaa nazirliginiñ «Yug» operativ komandanlığınıñ malümatına esaslanıp bildirdi.
Onıñ malümatına köre, eki raketanı ava mudafaa quvetleri tüşürdi, daa eki raketa ise limannıñ infrastruktura obyektlerine ücüm etti.
Ukrayına Tış işler nazirligi ücümni takbih etip, Rusiyeniñ iyülniñ 22-nde İstanbulda Ukrayınadan zahire ihrac etilüvini bloktan çıqaracaq añlaşma çerçivesinde alğan mecburiyetlerini şübhege oğrata, dep qayd etti.
«Rusiye Federatsiyasına tünevin İstanbulda imzalanğan vesiqada BM ve Türkiyege bergen vadelerni şübhege oğratmaq içün Odesa şeeriniñ limanına raketa ücümini kerçekleştirmek içün 24 saattan az kerek oldı. Rusiye raketası – [Rusiye prezidenti] Vladimir Putinniñ añlaşma içün büyük isse qoşqan ve Ukrayına minnetdarlığını bildirgen BM baş kâtibi António Guterres ve Türkiye prezidenti Recep Tayyip Erdoğannıñ yüzüne bir tükürüvdir», – dep yazdı Facebookta Ukrayına Tış işler nazirliginiñ spikeri Oleg Mıkolenko.
Onıñ aytqanına köre, Ukrayına Qara deñizden Ukrayına köy hocalıq mallarınıñ telükesiz ihrac etilüvinen bağlı añlaşmalarnıñ yerine ketirilmesi kerek olğanını qayd ete: Odessa, Çernomorsk ve Yujnıy limanlarından.
«BM ve Türkiyeni zahire ayatınıñ telükesiz çalışuv çerçivesinde Rusiye tarafından mecburiyetleriniñ yerine ketirilüvini temin etmege çağıramız. Añlaşmalarğa riayet etilmese, Rusiye azıq buhranı terenleştirgeninden mesüliyet taşıycaq», – dep bildire Ukrayına Tış işler nazirligi.
İstanbulda cuma künü, iyülniñ 22-nde, Rusiyeniñ büyük istilâsı şaraitlerinde boğday ve diger azıq mallarınıñ Ukrayınadan Ukrayına Qara deñiz limanlarından çıqarıluvı aqqında añlaşma imzalandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
