Rusiye prezidenti Vladimir Putin Ukrayınadaki cenknen bağlı planı muvafaqiyetli olamağanını tanımay. Bu aqta Ukraina Mudafaa nazirliginiñ Baş istihbarat idaresiniñ vekili Vadım Skibitskıy Qırım.Aqiqatqa ayttı.
O, Rusiyede tolu seferberlik ilân etilmese de, «gizli seferberlik» yapıla, dep qayd etti.
«Çünki bu başında qurğan planları muvafaqiyetsiz olğanını tanımaq demektir. Ve Putin bunı tanımaycaq», – dep qayd etti istihbarat vekili.
Skibitskıy Rusiye içün umumiy seferberlikni ilân etüv «Putin yeñilüvini» tanımaq olacaq, dep razı oldı, bir çoq arbiy közetici böyle tüşüne.
«Biz de öyle talil etemiz, çünki Lavrovnıñ (Rusiye Tış işler naziri Sergey Lavrov – QA) «mahsus operatsiya» alanını kenişletüv lafları ileri ketmek içün bir temel azırlağanlarını köstere, Donetsk, Lugansk vilâyetlerinde muvafaqiyetli olğanlarını kösterecek olalar, amma cenkni ilân etmeyler. Cenk ise fevralniñ 24-nden berli devam ete. Daa doğrusı, 2014 senesinden berli.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrayinalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
