Ukrayına prezidenti Volodımır Zelenskıynıñ fikirince, istilâ neticesinde zapt etilgen topraqlarnıñ qaytarıluvı köz ögünde tutulğan Rusiye ile er angi barışıq Moskva tarafından küçlerni toplap, cenkni devam ettirmek içün qullanılacaq.
Bu aqta Zelenskıy Wall Street Journal (WSJ) Amerika neşirine ayttı. O, Moskvanıñ areketlerini böyle izaatladı: «Eki vilâyetni yutqan kaşalot şimdi ayta: zıddiyetni toqtatayıq. Soñra eki-üç yıl raatlanır, daa eki vilâyetni yutıp kene aytar: zıddiyetni toqtatayıq. Ve toqtamayıp böyle devam etecek. Yüz fayız».
Zelenskıy Rusiyeniñ Ukrayınağa qarşı istilâsını izaatlap, kene mecaz qullandı: «Putin piton kibi ağzını açıp, bizni yutulacaq qoyan dep tüşündi. Amma biz qoyan degilmiz, ve o, patlaycaqtır».
Ukrayına prezidentiniñ aytqanına köre, memleketiniñ vatandaşları işğal altındaki topraqlar qaytarılmasa, bir de bir barışıq ya da Rusiye ile qaviy barışıq imkânsız olacağından emin.
WSJ neşirniñ sımarışınen Ukrayınada kevirilgen sorav malümatını aydınlata, oña köre, cevap bergenlerniñ 89%-ı topraq berilüvi olğan barışıq añlaşmasına qarşı çıqtı.
Fevralniñ 24-nde başlağan büyük istilâ devamında Rusiye ordusı Herson ve Zaporijjâ vilâyetleriniñ büyük qısmını, Lugansk ve Donetsk vilâyetiniñ aman-aman bütünley zapt etti. Bundan ğayrı, olar Harkiv vilâyetiniñ şarqını ve Mıkolayıv vilâyetiniñ cenübinde topraqlarnı kontrol ete. 2014 senesi Rusiye Qırımnı işğal etti, separatistler ise vilâyet merkezlerinen beraber Donetsk ve Lugansk vilâyetleriniñ bir qısmını kontrol altına aldı.
