Ukrayına istihbaratınıñ vekili Vadım Skıbıtskıynıñ Qırımğa ve Rusiyeniñ Qara deñiz flotuna HIMARS yardımınen darbe endirilmeli degen lafları «Rusiye mahsus arbiy operatsiyasınıñ (Rusiye Ukrayınağa qarşı cenkni böyle adlandıra – QA) sebebi bar olğanını isbatlay». Bu aqta Rusiye prezidentiniñ matbuat kâtibi Dmitriy Peskov TASS agentligine bildirdi.
«Rusiye toprağına qast etüvden ibaret laflar mahsus arbiy operatsiyanıñ doğru olğanını ve sebebi olğanını daa bir kere isbatlay, çünki Ukrayınanı tek bu vastalarnen böyle reberlik vekillerinden qurtarmaq mümkün», – dedi o.
Ukrayına Mudafaa nazirliginiñ Baş istihbarat vekili Vadım Skıbıtskıy Qırımdaki arbiy obyektlerge ve Rusiye Qara deñiz flotunıñ gemilerine Amerika reaktiv çoqlu ateş sistemalarından ateş açmalı, dep ayttı.
Bundan ğayrı, Ukrayına mudafaa naziri Oleksiy Reznikov BBC içün bergen intervyüda Kyiv «1991 senesine qadar halqara seviyede tanılğan sıñırlarğa qadar ketecek», dep ayttı. Onıñ qayd etkenine köre, Rusiye işğal etken Qırım, Donetsk ve Luğansk vilâyetleriniñ işğal altındaki yerleri de buña tabiiy olacaq.
Reznikov Ukrayına cenübiy vilâyetlerni işğalden azat etmege azırlana, dep bildirgen edi.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrayınalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
