Ukrayına Mudafaa nazirliginiñ Baş istihbarat idaresi elâk olğan arbiylerniñ cesedlerini berüv tedbiri aqqında haber etti. Ukrayına 45 imayecisiniñ naaşlarını aldı.
«Tedbir Ğayıp olğanlardan vekâletli Oleg Kotenko ve Ukrayına quvet qurulışlarınıñ işbirliginde Jeneva şartnamesine köre kerçekleştirildi», – dep aytıla Ukrayına istihbaratınıñ haberinde iyülniñ 19-nda.
İyülniñ 12-nde Ukrayınanıñ vaqtınca işğal etilgen topraqları meseleleri nazirligi bildirgenine köre, Kyiv elâk olğan 30 ukrayınalı arbiyniñ cesedini aldı.
İyünniñ soñunda Ukrayına nazirligi elâk olğan 46 ukrayınalı arbiyniñ cesedi qaytarıldı, dep bildirdi.
Hususiy allarda ğayıp olğan şahıslarnıñ meseleleri vekâletlisi Oleg Kotenkonıñ malümatına köre, iyülniñ 11-ne qadar yedi biñden çoq ukrayınalı arbiy ğayıp olğan olaraq sayıla.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrayınalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
