Rusiye «biñlernen arbiy cinayetni yaptı», qırımtatarlar ise soñki 8 yıl devamında «repressiyalarğa oğratıla». Bu aqta Qırım Muhtar Cumhuriyeti ve Aqyar prokurorı İğor Ponoçovnıy Rusiye mahkemesiniñ qırımtatar faali Azamat Eyupovğa çıqarğan ükmüni izaatlap ayttı.
«Rusiye Federatsiyası – Ukraina toprağına istilâ etken ve 2014 senesinden berli biñlernen arbiy cinayet yapqan bir devlet. Rusiyeliler qabaatsız bala, qadın, barışıqsever ealini kütleviy şekilde öldüreler, vatandaş infrastrukturasını yoq eteler. Medeniy cemiyette tasavvur bile etalmağan bu sert cinayetlerge baqmadan, işğalci devlet diqqatnı başqa yerge celp etmege tırışa ve rusiyeliler degil, Qırımnıñ tamır halqı «terrorist» ve «ekstremistler» ola, dep aytmağa tırışa», – dedi Ponoçovnıy.
Onıñ qayd etkenine köre, «8 yıldan berli qırımtatarlar repressiyalarğa oğratıla».
«Rusiye Federatsiyası ve işğalci memuriyetiniñ böyle siyaseti yarımadanıñ tamır ealisini diniy sebeplerden ayırımğa oğratmaq ve taqip etmek içün yapıla. Söz serbestligi, fikir serbestligi ve din serbestligini bastırmaq içün işğalciler ealini qorquzuv usullarını, işğal etilgen Qırım yarımadasında qurulğan qanunsız cinaiy adliye sistemasını qullana», – dep qoştı Ponoçovnıy. Qırım Muhtar Cumhuriyeti ve Aqyar prokurorı qayd etkenine köre, Ukrayına prokuraturası «yarımadada diniy sebeplerden qırımtatarlarnı qanunsız taqip etüvnen» (Ukrayına Ceza kodeksiniñ 146-ncı maddesiniñ 1-inci qısmı, 146-ncı maddesiniñ 2-nci qısmı, 162-nci maddesiniñ 2-nci qısmı ve 438-inci maddesiniñ 1-inci qısmı) bağlı cinaiy tahqiqatlar keçire.
İyülniñ 19-nda Rusiye Cenübiy okrugınıñ arbiy mahkemesi «qırımlı musulmanlar davasınıñ» mabüsi Azamat Eyupovnıñ ükmüni çıqarıp, 17 yıl sert rejimli koloniyada qalmasına qarar berdi.
2021 senesi fevral ayında Qırımda Qarasuvbazar, Bağçasaray, Aqmescit, Aqyar ve İçki rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şihametov, Ernest İbragimov ve Oleg Fedorov Qırımdaki Rusiye FSB idaresine ketirildi. FSB tahqiqatçılarınıñ tuvğanlarına bildirgenine köre, tutulğanlar Rusiye Ceza kodeksiniñ 205.5 maddesine istinaden qabaatlana. Qırımtatarlar Rusiyede yasaqlanğan ve Ukraina ve bir çoq memlekette milliy qanun seviyesinde sıñırsız çalışqan «Hizb ut-Tahrir» diniy teşkilâtınıñ faaliyetinen alâqası bar olğanında qabaatlandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
