Ukrayınağa qarşı büyük istilâ başlağanından Rusiye ordusınıñ ateşi neticesinde 353 bala vefat etti, dep haber ete Ukrayına Baş prokurorınıñ ofisi. İyülniñ 16-sı sabasına biñden çoq bala yaralandı.
«Bala meselelerinen oğraşqan prokurorlarnıñ resmiy malümatına köre, 353 bala vefat etti ve 662-den çoq bla farqlı yaralar aldı. Bu raqamlar tam degil, çünki faal cenk areketleri keçirilgen yerlerde, işğal etilgen ve azat etilgen topraqlarda iş devam ete», – dep aytıla haberde.
Ukrayına Baş prokurorınıñ ofisi malümatına köre, eñ çoq bala Donetsk vilâyetinde – 353, Harkiv vilâyetinde – 191, Kyiv vilâyetinde – 116, Çerniğiv vilâyetinde – 68, Lugansk vilâyetinde – 61, Mıkolayıv vilâyetinde – 53, Herson vilâyetinde – 52, Zaporijjâ vilâyetinde – 31 zarar kördi.
«İyülniñ 15-nde Herson şeerinde Rusiye Federatsiyasınıñ arbiyleri bir qadınnı ve kiçik qızını öldürdi. İyülniñ 14-nde Vinnıtsâğa açılğan ateş neticesinde yaralanğan daa üç bala aqqında belli oldı. İyülniñ 15-nde duşman Donetsk vilâyetiniñ Bahmut rayonına kene ateş açtı. Verhnekamenne köyünde 14 yaşında qızçıq yaralandı, Svâto-Pokrovskede 16 yaşında qız yaralandı», – dep aytıla haberde.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrayınalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
