Rusiyeniñ Ukrayınağa qarşı büyük istilâsı başlağanından 352 bala vefat etti, dep haber ete Ukrayına Baş prokurorınıñ ofisi. İyülniñ 15-i sabasına qadar biñden çoq bala yaralandı.
«Bala meselelerinen oğraşqan prokurorlarnıñ resmiy malümatına köre, 352 bala elâk oldı ve 657-den çoq bala farqlı yaralar aldı. Bu raqamlar tam degil, çünki cenk areketleri devam etken, işğal etilgen ve azat etilgen topraqlarda iş devam ete», – dep aytıla haberde.
Baş prokurornıñ ofisi bildirgenine köre, eñ çoq bala Donetsk vilâyetinde – 352, Harkiv vilâyetinde – 191, Kyiv vilâyetinde – 116, Çerniğiv vilâyetinde – 68, Lugansk vilâyetinde – 61, Mıkolayıv vilâyetinde – 53, Herson vilâyetinde – 52, Zaporijjâ vilâyetinde – 31 zarar kördi.
Haber etilgenine köre, iyülniñ 14-nde Vinnıtsâda raketa darbesi neticesinde 4 yaşında qızçıq ve eki oğlançıq elâk oldılar. Daa dört bala yaralandı.
Harkiv vilâyetindeki cinaiy uquq bozuvları qayd etilgende fevralniñ 24-nde Çuguyevge açılğan top ateşi neticesinde kiçik oğlançıqnıñ yaralanğanı belli oldı.
Bir çoq delilge baqmadan, Moskva Ukrayınada vatandaşlarğa ateş açmağanını ayta.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrayınalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
