Ukrayına prezidenti Volodımır Zelenskıy Ukrayına ortaqlarını Rusiyeni «terrorist devlet» olaraq tanıp, Rusiye Federatsiyası içün yañı sanktsiyalarnı tasdıqlamağa çağırdı. Bu aqta o, video muracaatında ayttı.
«Bu kün (iyülniñ 14-ü) Rusiyeniñ terrorist devlet olaraq tanılması kerek olğanını daa bir kere isbatladı. Dünyanıñ iç bir devleti Rusiye qadar terror telükesini ketirmey. Dünyanıñ iç bir memleketi barışıqsever şeerlerni ve adiy insan ayatını er kün qanatlı raketa ve reaktiv toplarnen yoq etmege izin bermey», – dep qayd etti Zelenskıy.
Onıñ qayd etkenine köre, Vinnıtsâğa kerçekleştirilgen tek bir raketa darbesi neticesinde 23 insan elâk oldı, üçü – 10 yaşını toldurmağan balalardır. Raketa tüşken yerlerde iş devam etkeni içün olarnıñ sayısı arta bile.
Zelenskıy, Rusiye bu raketanı endirgende Felemenkte, Gaagada, Rusiye arbiy cinayetlerinen bağlı konferentsiya keçe edi, dep qayd etti.
«O qadar deşet yaşatqan bir terror teşkilâtını hatırlaysıñızmı? Keçken cinayetleri halqara seviyede muzakere etilgende kene öldürmek. Rusiye em halqara uquq, em Avropa, em bütün medeniy dünyağa munasebetini köstere. Bundan soñ kimseniñ şübhesi olmasın, Rusiyeniñ Ukrayınağa qarşı istilâsınen bağlı Mahsus mahkeme mümkün olğanı qadar tez keçirilmeli», – dedi Zelenskıy.
Onıñ aytqanına köre, mahsus tazminat mehanizmi tez çalışıp başlamalı, onıñ yardımınen bütün Rusiye aktivleri ve parası musadere etilip, Rusiye terrorınıñ qurbanlarına zararlarını qarşılamaları içün berilmeli.
Cumaaqşamı künü saat 22:30-da Devlet fevqulâde vaziyetler hızmeti Vinnıtsâda qıdıruv-qurtaruv işlerini toqtattı. Soñki malümatqa köre, Rusiyeniñ raketa ücümi neticesinde 23 insan elâk oldı (hususan üç bala), 70-ten çoq kişi hastahanege alındı, tahminen 30 insan ğayıp oldı.
Rusiye akimiyeti ve akimiyetke qoltutqan Rusiye kütleviy haber vastaları Rusiye ordusı Ukrayınada vatandaş obyektlerine ve infrastrukturasına ücüm etmey, dep bildire. Er kün Rusiye Ukrayına şeer ve köylerine ateş aça, neticede vatandaşlar ve balalar can bere ve yaralana. Rusiye ücümleri mesken yerlerniñ yaşayışı içün müim olğan infrastrukturanı, hastahane, oquv yurtları, bala bağçaları ve evlerni yoq ete. Halqara uquq bunı arbiy cinayet dep adlandıra.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrayınalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
