Qırımnıñ Rusiye yolbaşçısı Sergey Aksenov iyün ayında yarımadada raatlanğanlarnıñ sayısı bıltırğa köre 40% eksildi, dep bildirdi. Onıñ aytqanına köre, Qırımdaki kurort mevsimi olmadı. Bu aqta o, «Krıminform» neşirine ayttı.
«İyünniñ dinamikasına baqtıq, resmiy qayd etilgen yerleşüv vastalarını talil etemiz – şahsiy sektor sayılmay: iyün ayında 815 biñ kişi raatlandı. Keçken senege köre – 40% az, 2019 senesine köre – tek 12% az. Mevsim bütünley olmağanını añlaymız. İnsanlar vaziyet deñişkeninden, logistika deñişkeninden stress yaşadı, şunıñ içün vaziyet deñişti», – dedi Aksenov.
Rusiyeniñ Ukrainağa kerçekleştirgen büyük istilâsınıñ ilk kününden «Aqmescit» ava limanı çalışmay. Ukraina prezidentiniñ Qırım Muhtar Cumhuriyetindeki temsilcilik malümatına köre, Rusiye ordusı «Aqmescit» ava limanını silâ ve askerlerni ketirmek içün qullana.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
