Rusiye, Ukrayınağa qarşı büyük istilâ neticesinde Beyazrusiyeniñ Silâlı quvetlerini yoq etmege isteydir, dep tüşüne Ukrayına prezidenti ofisiniñ mesleatçısı Mıhaylo Podolâk.
Öz Twitterinde Podolâk Moskva Beyazrusiyeni Ukrainağa qarşı cenkte tek «arbiy barlıqlılığınıñ qıtlığını» qarşılamaq içün iştirak etmege zorlamağa tırışmağanını tahmin etti.
«Rusiyege Beyazrusiye ordusınıñ yoq olması ve Lukaşenko rejiminiñ akimiyet tayançını coyması kerek. Soñra – Beyazrusiye Cumhuriyetiniñ yutulması ve Rusiye z-zombileri tarafından işğali», – dedi Podolâk.
Beyazrusiye Ukrainadaki büyük cenkniñ iştirakçisi olmasa da, fevralniñ 24-nde başlağan ve Rusiye ordusınıñ bir qısmı Beyazrusiye sıñırından kirgen Rusiye istilâsına maneviy-tehnik yardım köstere.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
