İşğal altındaki Qırımda iyülniñ 13-nde kimligi belli olmağan maskalı adamlar qırımtatar faali Rolan Osmanovnı hırsızlap ketti. Bu aqta «Qırım birdemligi» cemaat birleşmesi haber ete.
Berilgen malümatqa köre, Osmanov Aqmescitteki Rusiye kontrolindeki Qırım Yuqarı mahkemesiniñ binası ögünde hırsızlandı. Faal Lemmar Yunusovnıñ bildirgenine köre, Osmanov Rusiyeniñ Ekstremizm ile küreş merkeziniñ binasında buluna.
«Qırımtatar milliy areketiniñ faali Lemmar Yunusovnıñ haber etkenine köre, Rolan Osmanov oña telefon etip, Ekstremizm ile küreş merkeziniñ binasında bulunğanını ayttı. Onıñ menfaatlarını imayeci İslâm Velilâyev temsil etecek, advokat merkezge yol aldı», – dep aytıla haberde.
Bu malümatnı «Krım SOS» aq qorçalayıcı teşkilâtınıñ talilcisi Yevğen Yaroşenko da tasdıqlay.
«KrımSOS» malümatına köre, qırımtatar faali ve bloger Rolan Osmanov Ekstremizm ile küreş, «E» merkezine alıp ketirildi. Oña qarşı idariy protokol tizildi. Angi maddege istinaden tizilgeni ve Rolannıñ cezası belli degil», – dep bildire Yaroşenko.
Rusiye uquq qoruyıcıları vaziyetni şimdilik izaatlamadı.
Hatırlatamız, 2021 senesi dekabr ayında Rolan Osmanov o yıl sentâbrniñ 4-nde FSB binası ögünde toplaşuv içün 15 biñ ruble para cezasını aldı. O künü Aqmescit rayonınıñ Biy Tanış (Pervomayskoye) köyünde qırımtatar faali Nariman Celâlnıñ evinde tintüv keçirilgen edi.
2019 senesi aprelniñ 30-nda Rusiye uquq qoruyıcıları Rolan Osmanovnıñ evini tintken edi. Osmanov tutulmağan edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
