Rusiye Federatsiyasınıñ ordusı keçken künü tahminen 100 arbiyini ğayıp etti, dep bildirdi Ukrayına Silâlı quvetleriniñ Baş ştabı.
Berilgen malümatqa köre, Rusiyeniñ Ukrainağa qarşı kerçekleştirgen büyük istilâsı başlağanından tahminen 37,5 biñ Rusiye arbiyi öldi.
Bundan ğayrı, Ukrayına Silâlı quvetleri Baş ştabınıñ malümatına köre, fevralniñ 24-nden Rusiyeniñ ğayıpları böyle oldı:
- 1649 tank
- 3832 zırhlı araba
- 839 top sisteması
- 247 çoqlu ateş raketa sisteması
- 109 ava mudafaa vastası
- 217 uçaq
- 188 vertolöt
- 678 operativ-taktik seviyeli uçucısız cihaz
- 155 qanatlı raketa
- 15 gemi/kater
- 2704 maşina tehnikası ve avtotsisterna
67 dane mahsus tehnika.
«Duşman eñ çoq Mıkolayiv yönelişinde zarar kördi. Malümat alına», – dep qoştı Ukraina Silâlı quvetleriniñ Baş ştabı.
İyünniñ 9-nda The Guardian ingliz neşiri adını aytmağan yüksek seviyeli ğarbiy memurnıñ malümatına esaslanıp, fevralniñ 24-nden 20 biñ Rusiye askeri can bergen.
Moskva Ukrayınağa qarşı cenkte elâk olğanlarnıñ sayısı aqqında soñki vaqıtları bildirmey. Martnıñ 25-nde Rusiye tarafı ekinci kere Rusiye ordusınıñ zararları aqqında bildirdi. O malümatqa köre, 1351 Rusiye arbiyi elâk oldı, daa 3825 kişi yaralandı.
Cenk devam etkeni içün zararlarnı teşkermege mümkün degil.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
