Ukrayınanıñ bala meselelerinen oğraşqan prokurorlarınıñ resmiy malümatına köre, Ukrayınağa qarşı büyük silâlı istilâ neticesinde 349 bala elâk oldı ve 652-den çoq bala farqlı yaralar aldı, dep bildirdi iyülniñ 13-nde Ukrayına Baş prokurorınıñ ofisi.
Eñ çoq bala Donetsk vilâyetinde – 352, Harkiv vilâyetinde – 190, Kyiv vilâyetinde – 116, Çerniğiv vilâyetinde – 68, Luğansk vilâyetinde – 61, Mıkolayıv vilâyetinde – 53, Herson vilâyetinde – 52, Zaporijjâ vilâyetinde – 31 zarar kördi.
Berilgen malümatqa köre, iyülniñ 12-nde Donetsk vilâyetiniñ Severskinde açılğan ateş neticesinde 2 ve 17 yaşında eki oğlançıq yaralandı. Eki yaşında balanıñ alı ağır.
Cenk sebebinden ölgen ve yaralanğan balalarnıñ sayısınen bağlı malümat tam degil, çünki faal cenk areketleri yerlerinde, vaqtınca işğal etilgen ve azat etilgen topraqlarda iş devam ete.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
