Ukrayına prezidenti ofisiniñ yolbaşçı mesleatçısı Mıhaylo Podolâk Ukrayına Mudafaa nazirligi Baş idaresiniñ yolbaşçısı Kırılo Budanovnıñ tahminlerinen razı oldı. Budanov «çoqusı faal cenk areketi bu yılnıñ soñuna qadar biter ve Ukrayına Donbas ve Qırımnı keri alır», dep ayttı.
Bu aqta Podolâk Azatlıq Radiosınıñ «Novını Prıazovya» leyhasınıñ sualine cevap berip ayttı.
«Budanovnıñ tahminleri tarafsız ve uyğun ola. Cenk böyle de bitecek. Cenk Ukrayınanıñ şartlarınen bitecek ve Ukrayınanıñ topraqları qaytarılacaq», – dep bildirdi o.
Ukrayına prezidenti ofisiniñ yolbaşçı mesleatçısı Rusiye Ukrayınanıñ er angi toprağını kontrol etmemeli, dep qayd etti. Onıñ aytqanına köre, işğal altındaki topraqlar «ilerideki kerginleşüv içün platsdarm» olur.
«Rusiyeniñ Ukrayınada yutquzuvı, büyük, emiyetli, is etilgen yutquzuvı, yani Ukrayına topraqlarından ketmesi, Rusiyege memleket içinde deñişüvine, büyük telükesizlik sistemalarını Putinniñ Rusiye elitası yapqan telükelerden qurtarmağa imkân berecek», – dep qayd etti o.
Ukrayına Mudafaa nazirliginiñ Baş istihbarat idaresiniñ yolbaşçısı Kırılo Budanov Sky News içün intervyü berip, «çoqusı faal cenk areketleri yılnıñ soñuna qadar bitecek, biz coyğan bütün topraqlarımızda, hususan Donbas ve Qırımda Ukrayına akimiyetini ğayrıdan tikleycekmiz», dep ayttı.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrayinalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
