Rusiye «bütün Donbasnı azat etmege» niyetlene ve Ukraina cenübinden ordusını çekmeycek. Bu aqta Rusiyeniñ Büyük Britaniya elçisi Andrey Kelin Reuters agentligine ayttı.
«Bütün Donbasnı azat etmege azırlanamız», – dep ayttı Kelin, zıddiyet ne vaqıt bite bile sualine cevap berip. Elçi «Ordularınıñ Ukraina cenübinden çekilüvini tahmin etmek zor, çünki tecribeleri bar ve er kes ketken soñ, provokatsiyalar başlana, er kesni qurşunğa tizeler ve ilâhre», dep qoştı.
Kelinniñ aytqanına köre, erte ya da keç Kyiv qarar almalı: ya Rusiyenen barışıq añlaşmasını tizecek, ya soñuna doğru «taymağa devam etecek».
Bir kün evelsi Ukraina prezidenti Volodımır Zelenskıy CNNge intervyü berip, Ukraina Rusiye ile barışıq içün topraqlarını bermeycek, dep ayttı. Zelenskıy ğarbiy memleketlerni Ukrainağa arbiy yardım köstermege devam etmelerine çağırdı. «Büyük ve tez yardım ukrainalılarnıñ ayatlarını qurtarır ve Rusiye işğal etken topraqlarnı keri almağa yardım eter», – dedi Zelenskıy. Zelenskıy, «Ukrainanı NATOğa alsa ediler, er şey daa qolay olur edi», dep qayd etti.
«Silâ ketirilüvi strategik vaziyetimizni, mudafaamıznı telükege oğratsa, ciddiy tedbir almağa mecbur olacaqmız», – dedi Rusiye elçisi Kelin zıddiyetniñ kerginleşüv ihtimalı aqqında.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrayinalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
