İyülniñ 9-nda Qırım ve dünya musulmanları büyük bayramlardan biri olğan Qurban bayramını qayd etip başladı. Ukraina prezidenti Volodımır Zelenskıy Ukraina musulmanlarını, hususan qırımtatarlarnı tebriklep, «bir-birimizni serbest Qırımda tebrikleycek yılımız» olur dep ümütlerini ayttı.
«Ukraina ve dünya musulmanlarını tebriklep, barışıq olsun, yamanlıq ise daima yuttursın isteyim. Ne qadar tez olsa, o qadar yahşı. Qırımtatar halqı bunı pek bekley. Bir-birimizni serbest Qırımda tebrikleycek yılımız olur, dep işanam», – dedi Zelenskıy.
Qırımtatar Milliy Meclisiniñ reisi Refat Çubarov da musulmanlarnı Qurban bayramınen tebrikledi.
«Bu yıl bir çoq Ukraina musulmanı Qurban bayramını bayramğa oşamağan şaraitlerde qayd etecek: Ukraina silâlı quvetleriniñ ve territorial mudafaa askerleri okop, arbiy alan, blok-postlarda keçire; bir çoq qadın ve bala, esli-başlı insanlar – evlerinden uzaqlar, evlerini terk etmege mecbur ediler. Qırımnıñ Rusiye işğali vaziyetinde, şimdi işğal etilgen Herson ve Zaporijjâ vilâyetlerinde tamır qırımtatar halqı taqip ve zulumğa oğratıla – qırımtatar halqı Ukrainanıñ eñ büyük musulman cemiyetidir», – dep qayd etti Çubarov Facebookta derc etilgen hayırlavında.
Qurban bayramı – musulmanlarnıñ eñ büyük bayramlarından biri olıp, Mekkege acılıqnıñ soñuna kelgenini temsil ete. Oraza Bayramından 70 kün keçken soñ qayd etile.
Qurban Bayramı büyük meydanlarda cemaat ile qılınğan bayram namazından başlana ve ondan soñ qurban çalına. Bu ananeniñ tamırları Allahnıñ İbraim peyğamberge oğlu İsmailni qurban ketirmege bermeyip, qoynı kesmege buyurıp toqtatqanından kele.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
