Rusiyeniñ Kramatorsknıñ merkezine kerçekleştirgen raketa darbesi neticesinde eñ az bir kişi elâk oldı, daa altı insan yaralandı, dep bildirdi Donetsk vilâyeti arbiy memuriyetiniñ yolbaşçısı Pavlo Kırılenko.
Onıñ aytqanına köre, elâk olğanlarnıñ sayısı deñişe bile.
«6 inşaat darbeden zarar kördi, hususan musafirhane ve mesken çoq qatlı bina. Bu vatandaşlarğa qarşı bir ücüm. Raşistler silâsız insanlarnen «cenkleşmege» devam ete. Olarnı quvmasaq, böyle devam etecek», – dep yazdı o, Telegram kanalında.
Rusiye ordusı iyülniñ başında Kramatorskqa eki kün devamında «Smerç» çoqlu ateş reaktiv sistemalarından ücüm etken edi.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrayinalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
