Özbekistan parlamenti Qaraqalpaqstan suverenitetiniñ statusını yañı Anayasa leyhasında saqlamağa qarar aldı. Bu aqta parlamentniñ matbuat hızmeti bildirdi. Qarar olıp keçken kütleviy narazılıqlardan soñ qabul etildi.
«Özbekistan Cumhuriyetiniñ prezidenti Ş.Mirziyeyev Jokargı Kenes deputatlarınen ve cemaat vekillerinen körüşip, bütün tekliflerge emiyet bermek kerek olğanını qayd etti. Yani Özbekistan Cumhuriyetiniñ 70, 71, 72, 74 ve 75 maddeleri deñişmeycek, normalar ise saqlanacaq, dep qayd etildi», – dep aytıla haberde.
Qaraqalpaqstannıñ paytahtı Nukusta iyülniñ 1-nde Anayasa tüzetüvleri leyhası sebebinden narazılıqlar başlandı. Anda Esas qanundan Qaraqalpaqstannıñ suvereniteti ve halqınıñ umumiy referendum neticesi ayırıluv aqqını çıqarmağa teklif etildi.
İyülniñ 2-nde Özbekistan prezidenti Şavkat Mirziyeyev Nukusqa kelip, «qaraqalpaq halqı memnün olmasa», cumhuriyetniñ muhtariyetinen bağlı Anayasa maddelerini deñiştirmeycek, dep vade etti. Özbekistan İç işler nazirligi narazılıqlarnı qanunsız dep adlandırdı. Müessise haberinde «anayasa islâatlarınıñ yañlış tefsiri» aqqında da aytıla.
Mirziyeyevniñ malümatına köre, Nukustaki narazılıqlarda em narazılıq bildirgenler, em uquq qoruyıcılar arasında zarar körgenler bar. Lâkin prezident olarnıñ sayısını aytmadı. İyülniñ 3-nde Qaraqalpaqstanda fevqulâde vaziyet ilâk etildi ve saat 21:00-dan 7:00-ge qadar komendant saatı kirsetildi. Muhtariyette Özbekistan Milliy gvardiyasınıñ qoşmu küçleri buluna, mobil ağ ve internet sıñırlandı, dep bildire Azatlıq Radiosınıñ özbek hızmeti.
Özbekistan Milliy gvardiyası Qaraqalpaqstan sakinlerini «ihtiyacları olmasa, soqaqqa çıqmamağa ve çeşit resurslar tarqatqan malümatqa inanmamağa» çağırdı.
Özbekistan Milliy gvardiyasınıñ haberine köre, muhtariyette müim obyektlerniñ qoruması quvetleştirildi, naqliyat areketi sıñırlandı, vatandaşlarnıñ vesiqaları teşkerile ve Qaraqalpaqstan kiriş ve çıqışları sıñırlandı.
«Bu areketler Qaraqalpaqstan sakinlerini ve olarnıñ aq ve serbestliklerini qorumaq içün yapıla», – dep qayd etti Özbekistan Milliy gvardiyasınıñ vekili.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
