Tahminen 800 biñ ukrainalı Rusiye istilâsı neticesinde evsiz qaldı. Bu aqta iyülniñ 3-nde Strategik alâqalar ve informatsion telükesizlik merkezi Ukraina halq deputatı Olena Şulâknıñ malümatına esaslanıp bildirdi.
«Rusiye işğalcileri ukrainalılarnıñ 15 million metr kârelik meskenlerini yoq etti. Eñ çoq zarar Donetsk, Harkiv, Kyiv, Çerniğiv vilâyetlerinde oldı», – dedi Şulâk.
Onıñ aytqanına köre, tahminen 220 biñ ukrainalı yoq etilgen evleri içün tazminat arizalarını berdi.
İyülniñ 2-nde Ukraina prezidenti Volodımır Zelenskıy Rusiye ordusı Ukrainanıñ yüzlernen mesken yerini yoq etti, dep bildirdi.
İyülniñ 4-5-nde İsveçiyanıñ Logano şeerinde Ukrainanı ğayrıdan tiklev konferentsiyası keçirilecek. Bir sıra ilerilegen devlet ve halqara teşkilâtnıñ iştirak etmesi beklenile. Konferentsiyada Ukraina ğayrıdan tiklenüv planını ilk sefer taqdim etecek ve memleketni ğayrıdan tiklev ve halqara ortaqlar qoşa bilecek issenen bağlı teklifler baqılacaq.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
