Rusiyeniñ Ukrainanıñ cenübiy rayonlarına kerçekleştirgen istilâsı başlağanından 197 insan hırsızlanğanı belli, 74-ü tamır halqnıñ vekili, hususan – qırımtatarlar.
Bu aqta Qırımtatar resurs merkeziniñ yolbaşçısı Eskender Bariyev Kyivdeki «Büyük cenk vaqtında zarar körgenler: ihtiyaclar nasıl közde tutulır?» mevzulı matbuat konferentsiyasında ayttı.
«Yañı işğal etilgen topraqlarnıñ yañı işğali vaqtında 197 insan hırsızlandı, 74-ü tamır halqlarnıñ vekilleri. Bu tam sayı ola, dep aytmayım, amma bu insanlar aqkında bilemiz – bazıları azat etildi, bazıları Aqmescit SİZOsında ya da mağazlarda tutula. Taqdiri belli olmağanlar da bar», – dedi Bariyev.
2022 senesi fevralniñ 24-nden soñ esas Ukrainanıñ işğal etilgen topraqlarında yedi qırımtatarı tutuldı. Şimdi olar Qırımnıñ tahqiqat izolâtorlarında tutula ve Noman Çelebicihan qırımtatar batalyonında iştirak etkeninde qabaatlana. Herson ve Zaporijjâ vilâyetlerinde hırsızlanğan daa altı qırımtatarı işğal altındaki Qırımnıñ SİZOlarında buluna, amma qabaatları aytılmay.
Qırımtatar resurs merkeziniñ malümatına köre, 2022 senesi fevralniñ 24-ne qadar Qırımda 247 siyasiy mabüs bar edi, 177-si – qırımtatarı. Şimdi 133 siyasiy mabüs apiste, 90 kişi koloniyalarda, 43 insan SİZOlarda tutula. 120-si – qırımtatarı.
İyünniñ başında «KrımSOS» aq qorçalayıcı teşkilâtınıñ talilcisi Yevğen Yaroşenko Rusiye Noman Çelebicihan «qırımtatar batalyonını» «terror teşkilâtı» olaraq tanığan soñ Rusiye uquq qoruyıcılarınıñ işğal etilgen Herson vilâyetinde tutqan qırımtatarlarınıñ sayısı arta bile, dep tahmin etti.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
