Qırımlılarnıñ işğal etilgen Qırımdan Rusiye üzerinden esas Ukrainağa çıquvı Ukraina qanunlarını bozmay. Bu aqta «KrımSOS» aq qorçalayıcı teşkilâtınıñ uquqçısı Anastasiya Kalinina «Ğromadske radio» yayınında bildirdi.
«Qırımlılarnıñ işğal etilgen Qırımnıñ idariy sıñırından kiriş-çıqış kontrol keçiş noqtaları tışında sıñırdan keçüvi Ukraina qanunlarını bozmay. Pek kerek olsa, insanlar kete bile», – dep bildirdi Kalinina.
Aq qorçalayıcılar aytqanına köre, işğal etilgen Qırımdan çıquv Ukraina memuriy uquq bozuvları kodeksiniñ 17, 18, 247 maddelerine istinaden keçe ve memuriy mesüliyet belgilemey.
«KrımSOS», müddeti bitken Ukraina pasportlarınen qırımlılar Avropa Birligi memleketlerine kire ve andan Ukrainağa qayta bile, dep hatırlattı.
«KrımSOS» aq qorçalayıcı teşkilâtı Rusiye işğal etken Qırım sakinleri Ukraina vesiqalarını, hususan doğuv şeadetnamesini online ala bilecekler, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
