BM Ukrainadaki gumanitar meseleler sistemasınıñ koordinatorı Osnat Lubrani bildirgenine köre, Rusiyeniñ Ukrainağa qarşı başlatqan büyük cenki neticesinde elâk olğan beş biñ insan aqqında malümat bar. Onıñ aytqanına köre, bu «qorqunç kerçekniñ» kiçik bir qısmı ola.
«Raqamlarnı endi aytmaymız – olar da tam degil, çünki bütün kelgen haberlerni teşkerip olamadıq – yıqılğan hastahane, mektep, evler aqqında», – dep qayd etti o, iyünniñ 30-nda brifingde.
Bundan ğayrı, BM malümatına köre, aman-aman 16 million insan Ukrainada gumaniar yardımğa muhtac: suv, aş, tibbiy hızmet, ev, qoruma. Lubrani aytqanına köre, bu raqamlar ilk ola, BM olarnı gumanitar ortaqlarınen beraber ğayrıdan baqa.
Altı milliondan ziyade insan alâ daa memleket içinde köçkenler olaraq sayıla. Daa beş million qaytıp oldı, amma «çoqusı kene ketmege mecbur ola bilecegini añlay», dep qayd etti BM vekili.
«5,3 milliondan çoq kişi diger memleketlerde qaçaq oldı, eminim, çoqusı böyle bir vaziyette olacağını tüşünmegen bile», – dedi Lubrani.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
