Rusiye Federatsiyasınıñ Odesa vilâyetine kerçekleştirgen raketa darbesi neticesinde eñ az 17 insan elâk oldı, daa 30 kişi yaralandı. Bu aqta Devlet fevqulâde vaziyetler hızmeti bildirdi.
«İyülniñ 1-nde saat 01:00-de Belgorod-Dnistrovskıy rayonındaki qasabada raketa darbesi neticesinde doquz qatlı ev qısmen yıqıldı, yanında qurulğan 20 metr kârelik tükân yanıp başladı», – dep aytıla haberde.
Devlet fevqulâde vaziyetler hızmeti bildirgenine köre, viraneler tübünden yedi insan qurtarıldı, üçü bala ola.
Daa bir raketa aynı vaqıtta Belgorod-Dnistrovskıy rayonındaki raatlıq bazasına tüşti. Qurtarıcılarnıñ malümatına köre, anda üç insan elâk oldı, biri bala, daa bir insan yaralandı. Darbe sebebinden raatlıq bazasınıñ üç qatlı ve dört qatlı binaları qısmen yıqıldı.
Ücüm yerlerinde insanlarnı qıdırmağa devam eteler, dep bildire Devlet fevqulâde vaziyetler hızmeti.
Odesa vilâyetine Rusiye strategik aviatsiya uçaqları raketa endirdi, dep bildirdi vilâyetniñ arbiy memuriyeti.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
