Amerika mahsus hızmetleri Rusiyeniñ Ukrainağa qarşı cenkiniñ üç stsenariyini köre, eñ büyük ihtimallı – Rusiye quvetleri qısmen muvafaqiyetli olacaq, amma Rusiye prezidenti Vladimir Putinniñ maqsadlarına irişmeycek şiddetli bir zıddiyet. Bu aqta ABD Milliy istihbaratınıñ yolbaşçısı Avril Haines bildirdi, dep haber ete Reuters agentligi.
Diger stsenariylerde Rusiyeniñ büyük ilerilevi ya da cebe istiqrarlığında Ukrainanıñ muvafaqiyeti, işğal etilgen Herson ve cenübiy Ukrainanıñ diger rayonları yaqınlarında bazı muvafaqiyetler bar.
«Ebet, vaziyet bayağı qorqunç qala», – dedi Haines.
Onıñ aytqanına köre, Putin alâ daa Ukrainanıñ büyük qısmını zapt etmege istey.
«Vaziyet aynı, prezident Putinge baqıp, aynı siyasiy maqsadları olğanını, yani Ukrainanıñ büyük qısmını zapt etmege istegenini tüşünemiz», – dep bildirdi o.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
