Rusiye Qara deñiz flotunda olğan yedi suvastı gemisinden beşi Aqyardan deñizge çıqarıldı. Bu aqta Qırım.Aqiqat mühbiri bildire.
Aqyarnıñ Cenübiy körfezinde 4-ünci ayrı suvastı gemiler brigadasından 636.3 «Varşavânka» leyhasınıñ eki suvastı gemisi tura. Gemiler körfezniñ şarqiy yalısında iskelede tura.
Rusiye Qara deñiz flotunıñ terkibinde «Varşavânka» leyhasınıñ altı suvastı gemisi bar: B-261 «Novorossiysk», B-237 «Rostov-na-Donu», B-262 «Starıy Oskol», B-265 «Krasnodar», B-268 «Velikiy Novgorod» ve B-271 «Kolpino».
Flot erkânında 877V «Paltus» leyhasınıñ «Alrosa» suvastı gemisi bar. Qırım.Aqiqat bildirgenine köre, iyünniñ 28-nde bu gemi Rusiye Qara deñiz flotunıñ 13-ünci gemi tamir zavodında sekiz yıllıq tamirden soñ sınıvlarğa çıqtı. Gemi Kilen körfezinde zavod iskelesinden uzaqlaşıp, Aqyarnıñ tış reydine çıqtı.
Böylece, al-azırda deñizde Qara deñiz flotunıñ yedi suvastı gemisinden beşi buluna, dördü cenk uruşlarına azır ve bir danesi sınıvda buluna.
«Varşavânka» leyhasınıñ suvastı gemileri «Kalibr» qanatlı raketa taşıyıcıları ola. «Alrosa» da bu raketalarnı taşıy bile.
Qırım.Aqiqat bildirgenine köre, Cenübiy körfezde Qara deñiz flotunıñ yerastı gemilerinden birine «Kalibr» raketalarını yükleyler.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
