Aqyarda ve Qırımnıñ diger şeerlerinde iyünniñ 29-nda patlavlar oldı, dep haber ete «Podsluşano v Sevastopole» «VKontakte» içtimaiy ağında.
«Aqyarda ve Qırımnıñ diger şeerlerinde (Kezlev, Saq, Canköy) bir saat evelsi patlavlar eşitildi. Bu vaqıt devamında bir malümat yoq. Tek Canköy ve Saqtan fotoresimler keldi. Aqyarda ava mudafaası çalışqanda yüzlernen fotoresim, video ve haber bar edi. Ve bam-başqa ses», – dep aytıla haberde.
Patlavlar aqqında yerli Telegram kanallar da bildirdi.
Qırımnıñ Rusiye yolbaşçısı Sergey Aksenov Saq, Canköy ve Qurman rayonınıñ sakinleri «küçlü bir patlav» eşitkeni aqqında soray, dep bildirdi.
«Bu uçaqnıñ ses baryerinden keçüv sesidir. İnsanlar içün bir telüke yoq, vaziyet tınç ve kontrol altında», – dep yazdı o, Telegram kanalında.
Aqyar sakinleri iyünniñ 10-nda aqşam ava mudafaasınıñ işi neticesinde peyda olğan izlerni kökte kördi. Rusiye akimiyeti imaye sisteması kontrol etildi, dep bildirdi.
Martnıñ 26-nda «VKontakte» içtimaiy ağındaki Aqyar saifeleri kökteki izlerniñ foto ve videolarını derc etti. Rusiye Mudafaa nazirligi «Ukraina» uçucısız cihaznı tüşürgen ava mudafaa sisteması çalıştı, dep bildirdi. Rusiye bir delil köstermedi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
