Herson vilâyetiniñ Rusiye işğalci akimiyeti regionnıñ Rusiyege qoşuluvı aqqında «referendum» keçirilüvi azırlanıp başlandı, dep bildirdi.
«Referendumğa azırlanamız, ve onı keçirecekmiz. Herson vilâyeti qarar alıp, Rusiye Federatsiyasına qoşulacaq, subyekti olacaq», – dep bildirdi işğalci memuriyetniñ yolbaşçısı Kirill Stremousov. Onıñ Telegramda yazğanına köre, region sakinleri «Avropa uyduruvlarına ve Rabbiniñ Sevgi küçüni red etüvge degil, ananeviy qoranta qıymetlerine ve umumiy tarihımızğa qaytmağa istey».
«Rey berüvniñ» vaqtı şimdilik aydınlatılmay. Stremousov küzde olacaqtır, dep aytqan edi.
Herson şeer yolbaşçısı İgor Kolıhayevniñ mesleatçısı Galina Lâşevskaya onıñ tutulğanını bildirdi. Bu malümatnı Azatlıq Radiosınıñ «Novosti Priazovya» leyhasına Herson vilâyeti arbiy memuriyetiniñ yolbaşçısı Gennadiy Laguta da tasdıqladı. Herson şeer yolbaşçısını kim tuttı ve qayda alıp ketti belli degil.
İyünniñ 1-nde Kremlniñ matbuat kâtibi Dmitriy Peskov Donbasnıñ sahte «halq cumhuriyetleri», Herson ve Zaporijjâ vilâyetleriniñ kelecek statuslarınen bağlı qararlar bu topraqlarnıñ sakinleri tarafından qabul etilecek, dep bildirdi.
Fevralniñ 21-nde Moskva «LNR» ve «DNR» qanunsız silâlı gruppirovkalarınıñ «mustaqilligini» tanıdı, fevralniñ 24-nde Rusiye Ukrainağa er taraftan ücüm etti. Rusiye ordusı ve aydutlar Ukraina şarqı ve cenübinde topraqlarnı zapt etti.
Donbasnıñ bir qısmı ve Qırım 2014 senesi baarden berli Ukraina akimiyeti tarafından kontrol etilmey. Qırım «referendum» neticesinde Rusiye Federatsiyasınıñ bir qısmı olaraq ilân etildi. Moskva işğalni «tarihiy adaletniñ ğayrıdan tiklenmesi» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
