İşğal etilgen Qırımda kimligi belli olmağan insanlar Qırım köprüniñ resmi ve «Gaz qulleleri – daa başlanğıç» yazuvlı risalelerni tarqata. Bu aqta Ukraina prezidentiniñ Qırım Muhtar Cumhuriyetindeki temsilciligi bildirdi.
«İşğal etilgen Qırımda Ukraina prezidenti Volodımır Zelenskıynıñ laflarınen ve Qırım – Ukrainadır dep qayd etilgen kartlarnen beraber yazuvlı şiarlar tarqatıla», – dep aytıla haberde.
Qayd etilgenine köre, «Gaz qulleleri – daa başlanğıç» yazısınen ve Qırım köprüniñ resminen risaleler peyda oldı. Anda Rusiye akimiyetine qırımlılar Ukraina Silâlı quvetleriniñ qarşı ücümini bekley, dep haber etile.
Eñ çoq yazuvlı şiar Aluşta, Aqmescit ve Keriç şeerlerinde qayd etildi, dep bildirdi Ukraina prezidentiniñ Qırım Muhtar Cumhuriyetindeki temsilciligi.
İyünniñ 20-nde «Avropa birdemligi» Ukraina halq deputatı Oleksiy Ğonçarenko Ukraina Silâlı quvetleriniñ «Boykonıñ qullelerine» darbe endirgeni aqqında bildirdi. Rusiye Qırımnı işğal etken soñ Qara deñizdeki burğulav qulleleri zapt etildi.
«Çernomorneftegaznıñ» burğulav platformalarına darbe endirilgenini işğal altındaki Qırımnıñ Rusiye yolbaşçısı Sergey Aksenov da tasdıqladı. Onıñ malümatına köre, qullelerden 94 insan tahliye etildi. Neticede üç kişi yaralandı, daa yedi insan ğayıp oldı. Aksenovnıñ aytqanlarını tasdıqlaycaq mustaqil menba yoq.
Odesa vilâyeti arbiy memuriyetiniñ spikeri Serğiy Bratçuk Ukraina ordusı Qara deñizde gah qullelerine ateş açqanını tasdıqlağan resmiy malümat daa yoq, dep bildirdi. Onıñ fikirince, Ukraina Silâlı quvetleriniñ bunıñ içün sebebi bar edi. Bratçuk, Rusiye qullelerde arbiylerni ve arbiy donatmalarnı yerleştirdi, dep qayd etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
