Bir qaç Ukraina regionınıñ akimiyeti iyünniñ 25-ne keçer gecesi olğan kütleviy darbeler aqqında bildirdi. Bütün vilâyetlerde ava telüke signalı berildi.
Lviv vilâyetinde, vilâyet memuriyetiniñ yolbaşçısı Maksim Kozitskiyniñ aytqanına köre, Yavorov rayonındaki arbiy obyektke ateş açıldı. Közitskiy ava mudafaası eki raketanı tüşürdi, amma dört danesi nişanğa tüşti, dep bildirdi. Közitskiy angi obyekt aqqında aytılğanını aytmay: Yavorov rayonında bir arbiy poligon bar, mart ayında oña endi ateş açılğan edi.
Jitomir vilâyetinde Rusiye ordusı 24 raketa darbesini endirdi, dep bildirdi Jitomir şeer yolbaşçısı Sergey Suhomlin. Şeer zarar körmedi, amma şeer etrafındaki arbiy obyektler ücümge oğradı. Raketalar Beyazrusiye tarafından keldi, dep bildire Suhomlin. Bir arbiy elâk oldı, bir arbiy yaralandı, dep haber ete vilâyet memuriyetiniñ yolbaşçısı Vitaliy Buneçko.
Çerniğiv vilâyetinde Desna köyü rayonında Ukraina arbiylerini azırlağan merkezge ateş açıldı, dep bildirdi vilâyet memuriyetiniñ yolbaşçısı Vâçeslav Çaus. Raketalar em uçaqlardan, em yerustü taşıyıcılardan atıldı, dep bildirdi Çaus. İlk malümatqa köre, kimse zarar körmedi – tek infrastruktura bozuldı. «Sever» operativ komandanlığınıñ malümatına köre, umumen regionda tahminen 20 raketa atıldı.
Dnipropetrovsk vilâyetinde Krıvıy Riğ rayonınıñ Şirokiv ve Zelenodol qasabalarına ateş açıldı. 60 yaşında qadın zarar kördi, dep bildirdi vilâyet memuriyetiniñ yolbaşçısı Valentin Rezniçenko.
Rusiye mudafaa nazirligi bu darbelerni izaatlamadı.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
