İyülniñ 7-nde qırımtatar rejissöri Ernes Sarıhalilovnıñ «Mıhlar» qısqa filmi Ukraina kinematografistlerine qoltutmaq içün hayriye kösterilüvlerde olacaq. Bu aqta KrımSOS aq qorçalayıcı teşkilâtınıñ idare yolbaşçısı Denis Savçenko bildirdi.
«KrımSOS «Mıhlar» filmini dört yıl evelsi çıqardı. Ve 2022 senesi o, pek aktual oldı. Baş qaramannıñ ikâyesi on biñlernen ukrainalınıñ taqdirine oşay, olar da evsiz qalıp, yañı yerde ayat qurmağa tırışa», – dedi Savçenko.
«Mıhlar» filmi iyülniñ 7-nde «Ukraina kinematogafistlerine qoltutuv hayriye kösterilüvini açacaq. Online tedbirni Rusiyeniñ Ukrainağa qarşı kerçekleştirgen büyük ücüminden soñ qurulğan «Ukraina içün kinematografistler» teşebbüsi teşkil ete.
«Mıhlar» qısqa filmini rejissör Ernes Sarıhalilov KrımSOS ve Ukraina prezidentiniñ grantı yardımınen azırladı. Film 2018 senesi «Gençlik» 47-nci kinofestivali çerçivesinde taqdim etildi.
Levha büyük problemlerge oğrağan oğlançıq aqqında ikâye ete. Onıñ ikâyesi ayatlarını yañdan qurmağa tırışqan qaçaqlarnı mecaz yolunen köstere. Rejissörniñ aytqanına köre, onıñ ikâyesi onıñ balalıq hatıralarına esaslana.
«Mıhlar» bir çoq Ukraina ve halqara festival iştirakçisi ve ğalibi oldı, Büyük Britaniyada Westminster Film Festivalde «Eñ yahşı film» mukâfatını aldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
