BM insan aqları Yuqarı komissarınıñ idaresi Ukrainada Rusiyeniñ büyük istilâsı sebebinden 4662 insan ölgenini ve 5803 insan yaralanğanını tasdıqlap oldı.
Elâk olğanlar arasında – eñ az 320 bala, yaralanğanlar arasında 479 bala bar.
Bu malümat fevralniñ 24-nden iyünniñ 22-ne qadar alındı, dep bildirdi BM insan aqları yuqarı komissarınıñ idaresi.
Teşkilât kerçek raqamlar bayağı yüksek, dep qayd ete, «çünki cenk areketleri devam etken bazı yerlerden malümat keç alına ve tasdıqlanması kerek olğan vatandaşlar ölgenine dair malümat kelgen yerler çoq».
Bu, meselâ, Mariupol (Donetsk vilâyeti), İzüm (Harkiv vilâyeti) ve Popasna, Lısıçansk ve Severodonetsk (Lugansk vilâyeti) meskün yerlerinen bağlı, «anda, berilgen malümatqa köre, vatandaşlar arasında ölgen ve yaralanğanlar çoq. Olar verifikatsiyağa tabiiydir ve yuqarıdaki statistikağa kirsetilmegen».
BM qayd etkenine köre, çoqusı vatandaş ölümi keniş zararlı patlav silâsınıñ qullanıluvınen bağlı edi, ağır top ve çoqlu ateş reaktiv sistemaları, raketa ve ava darbeleriniñ ateşinen bağlı edi.
Mariupol şeer yolbaşçısı Vadim Boyçenkonıñ mayısta bildirgenine köre, tek bu şeerde Rusiye ordusınıñ yapqanları neticesinde 20 biñden çoq vatandaş can berdi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
