Rusiye uquq qoruyıcıları Sudaqnıñ Qutlaq (Veseloye) köyünde qırımtatar faali Nariman Kurukçiniñ evinde tintüv keçirdi. Bu aqta «Qırım birdemligi» cemaat birleşmesi qırımlı siyasetşınas Lenora Dülberniñ malümatına esaslanıp bildire.
«Yengil maşinalarnen kelgenler, altı kişi. Tintüv sebebi olaraq narkotiv saqlav ve tarqatuv şübhesi aytıldı, amma bu formal bir sebep, çünki Nariman ağa faal olmaqnen beraber İlver ağa Ametovnıñ dostu ola», – dep bildire Dülberniñ aytqanlarını «Qırım birdemligi».
«Qırım birdemliginiñ» malümatına köre, Nariman Kurukçiniñ evinde tintüv bitti, onı tutmadılar. Tintüvni Sudaqtaki Rusiye İç işler nazirligi bölüginiñ hadimleri Rusiye kontrolindeki Sudaq şeer mahkemesiniñ qararınen keçirdi.
Rusiye uquq qoruyıcıları tintüvni açıq sürette izaatlamay.
Qırım.Aqiqat tafsilâtlı malümat almağa tırışa.
2022 senesi aprel ayında Rusiye kontrolindeki Sudaq şeer mahkemesi yerli Meclis reisi İlver Ametovnıñ davası boyunca ilk oturışuvnı keçirdi. Faal «silânı qanunsız saqlağanında» qabaatlana, laf siyasetçiniñ ev müzeyinde cam arqasında olğan Ekinci cian cenki zamanlarınıñ silâ parçaları aqqında kete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
