Rusiye ordusı iyünniñ 22-nde saba Harkivniñ Slobodskıy ve İndustrialnıy rayonlarına ateş açtı, neticede bir qaç büyük yanğın çıqtı, sabadan berli Nemışlânskıy rayonına ateş açıla. Bu aqta vilâyetniñ arbiy memuriyet yolbaşçısı Oleg Sinegubov Telegram kanalında haber etti.
İlk malümatqa köre, üç insan yaralandı. Malümat teşkerile.
Oleg Sinegubov Rusiye ordusı Çuguyevge kene ateş açtı, dep haber etti – ilk malümatqa köre, 2 insan elâk oldı, daa eki kişi yaralandı, mesken evler ve hocalıq inşaatları viran etildi.
Zoloçivde ateşten sebep çoq qatlı ev zarar kördi, yanğın çıqtı. Can bergenniñ cesedi tapıldı. Şimdi qurtaruv işleri devam ete, daa 2 insannıñ virane altında qaluv ihtimali bar.
Şevçenkovodo Rusiyeniñ darbesi neticesinde keçken aqşam 1 insan yaralandı.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
