Saba Mıkolayıvge açılğan ateş neticesinde iyünniñ 22-nde bir insan vefat etti, eki insan yaralandı, dep haber ete şeer yolbaşçısı Aleksandr Senkeviç.
«Zarar körgen eki müessise aqqında malümatımız bar. Bu şahsiy müessiseler, anda yanıcı-yağlayıcı qarışmalar bar. Bir mektep zarar kördi, camlar sındırıldı, dam zarar kördi. Beş beş qatlı ev, kirişlerniñ qapuları, pencereleri sındırıldı. Yani er şey», – dedi Senkeviç iyünniñ 22-nde umummilliy telemarafon yayınında.
Senkeviçniñ aytqanına köre, raketa tüşkeninden müessiselerden birinde yanğın çıqtı, «aman-aman bütün şeer – qara tütünde».
«Yanğıncılar çalışa, amma anda er şey yanmalı, çünki onı söndürmek imkânsız», – dedi şeer yolbaşçısı.
Bundan ğayrı, onıñ aytqanına köre, yıqılğan dört şahsiy ev aqqındma malümat bar: «dam, pencere, qapular».
Mıkolayıv vilâyet arbiy memuriyetiniñ yolbaşçısı Vitaliy Kum saba bildirgenine köre, yedi Rusiye raketası darbe endirdi.
Mıkolayıv şeer yolbaşçısı Aleksandr Senkeviç bildirgenine köre, cebe Mıkolayıvden 20-30 km – Rusiye ordusı Herson vilâyetine yaqın şeer rayonlarına ateş aça.
Rusiye ordusı Mıkolayıv vilâyetine muntazam sürette ateş aça.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
