Rusiye 1-inci ordu korpusınıñ 11-inci ayrı motorlı atıcılıq alayınıñ bölükleri büyük zarar körip, uruş küçüni ğayrıdan tiklemesi içün cenk areketleri alanından çıqarıldı, dep bildirdi Ukraina Silâlı quvetleriniñ Baş ştabı.
«Duşman em askerlerini, em tehnikasını coya. Alınğan malümatqa köre, keçken künü Mudafaa küçleri duşmannıñ eñ az 30 dane tehnikasını ve silâsını yoq etti. Şimdilik malümat teşkerile ve soñra derc etilecek. Duşmannıñ silâ anbarları patlatıla. Rusiye işğalcileriniñ qaçqanı daa sıq qayd etile», – dep aytıla haberde.
Ukraina Silâlı quvetleriniñ Baş ştabı malümatına köre, Rusiye arbiyleri cenk areketlerinen beraber Harkiv, Slavânsk, Severodonetsk, Bahmut, Liman, Yujnıy Bug yönelişlerinde darbe endire.
Ukraina Silâlı quvetleriniñ soñki malümatına köre, Rusiye Ukrainağa qarşı cenkte 33 350 askerini coydı.
İyünniñ 9-nda The Guardian ingliz neşiri adını aytmağan yüksek seviyeli ğarbiy memurnıñ malümatına esaslanıp, fevralniñ 24-nden 20 biñ Rusiye askeri can bergen.
Moskva Ukrainağa qarşı cenkte elâk olğanlarnıñ sayısı aqqında soñki vaqıtları bildirmey.
Cenk devam etkeni içün zararlarnı teşkermege mümkün degil.
Ukrainanıñ zararlarınen bağlı tam malümat da yoq. Ukraina prezidenti ofisiniñ yolbaşçı mesleatçısı Oleksiy Arestovıç iyünniñ 10-nda, onıñ esaplarına köre, cenk başlağanından 10 biñge qadar Ukraina arbiyi elâk oldı, dep ayttı.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
