Ukraina mevzilerini pekitkende ve Rusiye ordusı fevralniñ 24-ne qadar olğan mevzilerge qaytqanda Rusiye ile barışıq muzakerelerini yañıdan başlata bile, dep bildirdi Rusiye ile muzakerelerde Ukraina eyyetiniñ yolbaşçısı, Ukraina halq deputatı ve «Sluğa narodu» fraktsiyasınıñ yolbaşçısı David Arahamiya.
«Eñ minimal añlaşma fevralniñ 24-ne qadar olğan mevzilerge qaytsalar ya da biz olarnı quvsaq, olur. Biz er angi siyasiy añlaşmanı baqar edik – İstanbulda teklif etkenimiz kibi. Biz, meselâ, bir qaç yıl devamında Qırım meselesini kötermeymiz, bunı cenk yolunen yapmaymız, amma bunı diplomatik ve siyasiy usulnen yapamız», – dedi o, «Amerikanıñ sesine».
Ukraina daa quvetli seviyede muzakerelerni ne vaqıt yañıdan başlar degen meselede Arahamiya avgustnıñ soñu aqqında aytıla.
Avgustnıñ soñunda ne olacaq sualine böyle cevap berdi: «Rusiyelilernen planlarımıznı paylaşmağa istemeymiz, çünki olar bunı açıq menbalarda köre bileler. Amma men böyle tüşünem: bazı yerlerde qarşı ücüm yapacaqmız».
İyünniñ 16-nda Kyivge Frenkistan prezidenti Emmanuel Makron, Almaniya kantsleri Olaf Şolts, Romaniya prezidenti Klaus Yohannis ve İtaliya baş naziri Mario Dragi keldi. Bu ziyaretten soñ Die Welt alman neşiri «qapalı qapu arqasında» Almaniya, Frenkistan ve İtaliya liderleri Ukraina prezidentinden Rusiye ile muzakerelerni yañıdan başlatmasını rica etkenler, dep bildirdi. Zelenskıynıñ spikeri bunı inkâr etti.
İyünniñ 15-nde soñki vaqıtları lafları Kyiv tarafından hoş qarşılanmağan Makron Ukrain prezidenti ve akimiyet vekilleri Rusiye ile barışıq añlaşmalarını keçirmeli, dep ayttı. Aynı vaqıtta, ertesi künü Kyivge kelip, Ukraina Rusiye ile muzakereler ne vaqıt ve nasıl şartlarda olacağını belgileycek, dep qayd etti.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
