Ukraina Silâlı quvetleriniñ general mayorı Dmıtro Marçenko Qırım.Aqiqatqa intervyü berip, ordunı fevralniñ 24-ne qadar olğan yerlerge çeküv aqqında añlaşma olsa, Rusiye Ukrainanı cenk yolunen zapt etmekten vazgeçmeycek, şunıñ içün Ukraina Silâlı quvetleri «Lugansk, Donetsk, Herson ve Qırımnı keri almalı», dep ayttı.
«Menden bir kere sorağan ediler: meseleni siyasiy yolnen çezüvge ne deysiñiz, bu ölümlerni toqtatmaq içün topraqlarnıñ bir qısmını bermege kerek olsa? Men yoq deyim, kesen-kes yoq. Bütün topraqlarnı keri almalımız, Lugansk, Donetsk, Herson, Qırımnı almalımız. Birisi şimdi er şey biter, er şey yahşı olacaq, dep tüşünse, bu yañlış, çünki ileride daa beter olacaq. Duşmannı evine yiberermiz, anda yaralarını sarar, belli hulâsalar çıqarır, cenk nizamını tüzetir ve daa bir kere ücüm eter. Ve artıq bu memleket dayanırmı belli degil», – dedi Marçenko.
İyünniñ 13-nde Ukraina prezidenti Volodımır Zelenskıy «biz Qırımımıznı da azat etecekmiz», dep ayttı.
«Ukraina bayrağı Yalta ve Sudaq, Canköy ve Kezlevde kene dalğalanacaq. Ve Qırımda qıymetli topraqnı zapt etken er bir Rusiye memurı unutmasın: bu topraqta olarğa raatlıq yoq», – dep ayttı o, Ukraina halqına yapqan muracaatında.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
