Aqmescit şeeri ve yaqın qasabalarnıñ sakinleri şeerde küçlü bir patlav eşitildi, dep bildire içtimaiy ağlarda. Bu malümatnı Qırım.Aqiqatnıñ oquyıcıları ve mühbirleri de tasdıqladı.
Olarnıñ aytqanına köre, patlav sesi Aqmescitniñ bütün taraflarında eşitildi. Pek küçlü olğanı içün maşinalarnıñ signalizatsiyası çaldı.
Adiseni izaatlağan Qırımnıñ Rusiye yolbaşçısınıñ mesleatçısı Oleg Krüçkov patlavnıñ sebebi uçaqnıñ ses baryerinden keçkeni ola bile, dep tahmin etti.
«112-ge bir haber kelmedi. Kökteki patlav sebebi uçaqnıñ ses karyerinden keçmesi büyük ihtimal», – dep bildire Krüçkovnıñ aytqanlarını «Krım 24» Rusiye telekanalı.
Qırımnıñ Rusiye akimiyeti vekillerinden ya da Rusiye Mudafaa nazirliginden şimdilik bir izaat berilmedi.
Rusiyeniñ Ukrainağa qarşı cenki başlağanından Qırımda Rusiye arbiy uçaqları sıq-sıq körüne.
